Det finst tre levande samiske språk i Noreg i dag, nemleg nordsamisk, sørsamisk og lulesamisk. Lulesamisk og sørsamisk er språk med svært få brukarar, mens nordsamisk er det klart største språket i heile det samisktalande området i Norden.
Samar har gjennom tidene vore utsette for massiv fornorsking. Formålet var hovudsakleg politisk: å sikre herredømme over nordområda. Men fornorskingspolitikken baserte seg på ein ideologi som gjekk ut på at samisk kultur var mindre verd enn norsk kultur. Dette har ført til at mange samar gjennom tidene har lært å forakte det samiske.
Samar er eit urfolk og har derfor i dag eit særskilt vern av språket sitt og kulturen sin. Dei samiske språksamfunna er små, og dette gjer det krevjande å ha eit fullverdig språk på alle samfunnsområde. Negative haldningar til samisk språk og kultur gjer det også krevjande å vere samisktalande.